Vigan City – Ingunamgunam ni Samahang Industriya ng Agrikultura Chairman Rosendo So a rumbeng a bantayan ken paingeten pay dagiti checkpoint iti probinsia kalpasan iti pannakairekord iti kaunaan a kaso iti African Swine Fever partikular idiay Bario-an, Tagudin.
Iti pannaki-uman ti Bombo Radyo Vigan ken ni So, napeggad kadagiti taraken a baboy ti ASF no awanan ti bakuna kontra ti nasao a sakit.
Segun ken ni So, nu man pay processed meat wenno frozen meat ket mabalin latta a maapektaran ti ASF dagiti taraken dagiti backyard hog raiser ta posible a saan a matay ti virus.
Kalaksidan iti processed ken frozen meat ket patienna a ti maysa pay a pagtaudan ti ASF ket ti swill feeding wenno ti panagpakan iti tidtidda a taraon kadagiti taraken.
Gapu iti dayta ket imbalakadna a nasaysayaat laengen a ti ipakan ket feeds tapno maliklikanen iti panagwaras iti virus.
Nu pay kasta ket impasigurado na a saan a makaapektar ti nasao a sakit kadagiti tao ken ti sabali pay a taraken.
