VIGAN CITY – Inlawlawag ni Provincial Quarantine Officer Martel Quitoriano a saanda a nalibasan iti pannakastrek ti Aluminum Wing Van a nagkarga ti sangapulo ket uppat a baboy ken dua a container ti botcha a karne ti baboy a nasalamaan idiay Ayudante, Candon City idi kalman.
Segun ken ni Quitoriano, nakikinnammayet da ti Tagudin municipal police station ken Candon City police station tapnu saanen a makaadayo pay iti nasao a lugan isu a nasalamaan da idiay Barangay Ayudante.
Mainaig dayta, kiniddaw ni Quitoriano a makitinnulong dagiti umili tapnu saan a makastrek ditoy probinsiya ti African Swine Fever virus.
Ti agdama, makikinkinnammayet da pay laeng idiay Pangasinan nu kasanu iti pannakai-dispose dagiti nasao a baboy agsipud ta adda iti protocol a masurot.
Innayon na nga adda iti lead-dan no siasino iti akinkukua kadagiti nasao a baboy ngem kidkiddawen na iti publiko a saan a karintaren ti PNP iti panagimbestigar da.
Kabayatanna, pinasingkedan ni Police Lt. Col. David Dulnuan, hepe ti Candon City police station a nakasoan dan iti nagmaneho ti wing van ken dagiti pahinante na iti panaglabsing ti Republic Act 10536 Ammending Republic Act 9296 wenno Meat Inspection Code of the Philippines a ti posible a dusa da ket pannakaibalud ti innem agingga sangapulo ket dua a tawen ken agmulta da ti sangagasut a ribo a pisos agingga maysa a milyon a pisos.
Nabigbig iti nagmaneho ti nasao a wing van a ni Edgar Atiagan Dela Cruz nga agtawen ti uppat a pulo ket siyam (49), naasawaan ken agnaed idiay Barangay Ayusan Norte, Vigan City, kadua na dagiti pahinante na a da Mark Bryan Piedad nga agtawen ti sangapulo ket walo nga agnaed idiay Barangay Ora West, Bantay kenni Rafael Santos nga agtawen ti dua pulo ket maysa nga agnaed idiay Upig, San Ildefonso, Bulacan ngem agmada nga agnanaed idiay San Julian Sur, Vigan City.
Saan a nakarehistro iti wing van a nausar ken nag-expire iti lisensya ni Dela Cruz a nagmaneho iti nasao a lugan.
