Sangapulo ket maysa iti nadundunor iti pannaka-aksidente iti pampasahero a jeep itattay malem iti national highway idiay Sitio Kakaldingan, Barangay Lungog, Narvacan, Ilocos Sur.
Ti nagmaneho iti pampasahero a jeep ket ni Edson Javier, agtawen iti uppat a pulo ket dua a taga-Barangay Pantoc, San Quintin, Abra ken dagiti pasaherona ket sangapulo iti nataengan idinto nga uppat iti ubbing.
Iti imbestigasyon, naggapu idiay Abra ken agturong ti pampasahero a jeep idiay Narvacan idin nadanonna iti zigzag road iti agpababa a paset iti nasao a lugar idin naawanan iti preno isu nga indungpar ti driver iti semento iti igid ti kalsada a gappuanan iti panagbaliktad iti lugan.
Iti pannaki-uman ti Bombo Radyo Vigan ken ni PMaj. Alexander Dangli a Chief of Police iti Narvacan Municipal Police Station, walo a nataengan ken tallo nga ubbing iti nadundunor a nagsagaba iti minor injuries.
Segun ken ni Dangli, maysa a pasahero iti na-fracture iti abagana nga isun ti kakaroan iti sinagabana.
Agpapada a naipan iti Ilocos Sur District Hospital – Narvacan dagiti pasahero a nadunor para iti pannakatamingda.
Nupay daan iti pampasahero a jeep ket impasigurado ti driver a kitkitaenna iti lugan sakbay iti panagbiahena isu a saanna a namnamaen a mapasamak iti aksidente.
