Pinasingkedan ni National Bureau of Investigation Director Atty. Melvin Matibag a dagiti statement ni Vice President Sara Duterte mainaig ti maipagarup a pannakipatang na iti hitman ket saan laeng a ang-angaw ngem maysa a “serious, active, ken continuing threat.”
Segun iti testimonia ni Matibag, ti imbestigasion ti NBI ket mangipakita a dagiti inib-batan a sarita ti bise presidente ket saan a mabalin nga iyaleng-aleng.
Dinakamat ti ahensia dagiti pagannurotan iti panagsukisok ti nadakamat a pangta, pakairamanan ti pattern ti kinaranggas, kinadagsen ti insidente, kabaelan, motibo ken identidad dagiti tao a nadakamat.
Kas maudi a testigo ti prosekusyon para iti Article IV, namnamaen ti prosekusyon nga agbalin a kritikal ti testimonia ni Matibag iti panang-timbang ti impeachment court iti kinadagsen ti ebidensia a maipasango.
