Inlawlawag ni Vigan City Mayor Randy Singson a legal ti panangtiliwda kadagiti motorista a naariwawa ti muffler-na ta adda memorandum manipud iti Land Transportation Office a maiparit ti modification.
Iti press conference a naisayangkat, kinuna ni Singson nga uray no nariri ti motorsiklo no la ket adda maipakita ti drayber nga Import Commodity Clearance (ICC) certificate ti tambutsoda ket saanda a matiliw.
Naputar ti ordinansa agsipud ta napaliiw a kaaduan iti siudad ket agar-aramat iti naariwawa a muffler, banag a saan nga ipalubos ti mayor.
Kabayatanna, pinasingkedan met ni Vice Mayor Glendale Benzon a 2 a wagas ti mabalin a pakatiliwan dagiti agar-aramat iti muffler.
Umuna ket ti modification wenno dagiti modified muffler idinto a ti maikadua ket no awan ti clearance wenno Philippine Standard Mark-na.
Tapno maliklikan ti pannakaaramat dagiti downloadable a PS mark, nagkiddawda iti Department of Trade and Industry iti listaan dagiti amin nga accredited installer, ken accredited muffler.
No met bilang ta awan parikut kadagiti motorista kadagiti nasao a banag, ngem nariri latta ti luganda ket isunto ti gundaway nga ipatungpalda ti decibel meter.
Ngem iti agdama, yur-urayda pay laeng ti Registered Certificate of Calibration manipud iti supplier sakbay a mausarda ti nasao a device.
