VIGAN CITY – Kiniddaw ni ACT OFW Partylist Rep. John Bertiz kadagiti local government unit nga amuenda no adda kailianda kadagiti overseas filipino worker nga agtaltalinaed pay laeng agingga tatta idiay Nasugbu, Batangas uray no naileppasdan iti 14 day quarantine period.
Segun ken ni Bertiz, no adda kailianda iti quarantine facility idiay Batangas ket rumbeng nga adda iti inisyatiboda a mangsundo kadakuada iti nasao a lugar ta addaanda metten ti certification a mangpaneknek a naileppasdan iti panagquarantine-da pakairamanan iti swab testing isu nga awan ti rumbeng a pagdanagan dagiti opisial ken dagiti agindeg iti lugarda.
Malaksid iti dayta, agtultuloy iti pannakikinnammayetda iti Overseas Workers Welfare Administration ken iti Department of Transportation para iti panagawid dagiti OFW a nastranded ken kasta payen ti “mercy voyage” wenno tulong kadakuada nangruna ta naawananda ti trabaho gapu iti COVID19 pandemic.
