Immapela ni Sen. JV Ejercito kadagiti kakaduana iti Senado nga insigida nga ipasa ti Senate Bill No. 1 a gagem a mailatangan ti nayon a P74.4 billion a subsidiya ti PhilHealth.
Impaganetget ni Ejercito ti kinapateg ti insigida a pannakaipatungpal ti Universal Health Care Law a nakadepende iti umdas ken maikanito a pondo manipod iti gobierno.
Segun ken ni Ejercito, rumbeng a paypaysoen ti nasao a kinapateg ti linteg ta kurang laengen ti agresibo nga implementasyon ken umdas a pondo.
Ni Ejercito ti akin-surat ken sponsor iti nasao a linteg isu nga inyunay-unayna ti supplemental budget para ti PhilHealth, karamanen ti nayon nga alokasyon para kadagiti ospital nga isu ti tulbek iti pannakaipatungpal ti zero balance billing kadagiti pampubliko nga ospital a maysa nga impaganetget ni President Ferdinand Marcos Jr. iti State of the Nation Address-na.
Kinunana a ti umanay a pondo iti PhilHealth ket makatulong tapno makissayan ti gastos ti medical kadagiti marigrigat, senior citizen ken dadduma pay a karaman iti vulnerable sectors.
