Impaiman ti Department of Justice (DOJ) iti Department of Information and Communications Technology (DICT) ken dadduma pay nga ahensia ti addang tapno maliklikan a maulit ti insidente iti school shooting a naka-livestream iti social media platform.
Dayta ket iti napasamak a pammaltog idiay Zamboanga idi August 18 a naka-live pay laeng ti ubing a nagpaltog bayat ti insidente a nakatayan ti dua nga estudyante.
Segun ken ni DOJ Undersecretary Ian Norman Dato, addan kadagiti ahensia a maseknan iti pangngeddeng no ania iti aramidenda iti polisiya tapno saanen a maulit pay ti pasamak.
Kinuna pay ni Dato a naisina dayta iti mandatoda nga i-evaluate iti amin a maaw-wat a reklamo iti ahensia.
Iti agdama, pinilaanen ti Philippine National Police (PNP) ti reklamo ti ama ti estudyante a karaman kas rehistrado nga akin-kukua iti naaramat a paltog.
