Sinuspenso ti Land Transportation Office (LTO) iti panang-impound kadagiti light electric vehicle (LEV) kas iti e-bikes ken e-trikes a makita a dumalan kadagiti national road.
Segun ken ni LTO Chief Markus Lacanilao, inton January 2, 2026 ket marugian ti nainget a pannakaipatungpal ti impounding.
Ti addang ket gagem a maikkan ti gundaway dagiti e-vehicle rider nga agbalin a pamiliar kadagiti regulasyon sakbay a marugian ti full enforcement inton sumaruno a tawen.
Kinunana a kas tignay iti arungaing iti publiko ken gapu ti pannakanggeg da President Ferdinand Marcos Jr. ken Secretary Giovanni Lopez iti concern ket temporaryo nga awan iti impounding operation bayat iti panangipatungpal ti information drive.
Innayonna a mangrugi December 1, 2025 ket agbalinen a visible dagiti LTO enforcer ken personnel kadagiti kalsada tapno iduron ti information drive ken ilawlawag iti publiko iti husto a panagaramat kadagiti LEV.
