Kiddaw ni Governor Ryan Luis Singson a no marugianan iti General Community Quarantine inton May 1 ditoy probinsia ket rumbeng laeng a makitinnulong dagiti agindeg tapno maliklikan iti covid-19.
Segun kenni Gov. Singson, rumbeng nga agbalin latta a disiplinado, makikooperar ken makitinnulong dagiti agindeg tapno mapagtalinaed latta a covid-19 free iti probinsia nga Ilocos Sur.
Gapu iti manamnama a general community quarantine ket naluklukayen iti pannakaiyetnag iti paganurutan ta posible a maikkaten ti checkpoint kadagiti barangay ken pannakaikkat iti panagaramat iti pass slip, pannakapalubos iti panagsubli iti transportasyon ken pannakalukat dagiti dadduma a negosyo pakairamanan dagiti hardware ken kasta pay a pannakaituloy dagiti proyekto iti lokal a gobierno.
Ngem no man pay kasta ket agtalinaed latta met iti curfew hour manipod iti alas otso iti rabii agingga iti alas singko iti bigat ken pannakaisayangkat iti checkpoint kadagiti border ditoy probinsia kasta pay iti pannakaiparit iti panagruarto dagiti agtawen iti innem a pulo agpangato ken dagiti ubing agingga agtawen iti dua pulo kas inyetnag iti national government.
Malaksid iti dayta ket nawaya latta dagiti Overseas Filipino Worker ken agawid nga agindeg a makikammayet kenni Gov. Singson para iti panagkiddawda iti tulong ngem kiddawna nga aganusda pay laeng agingga maikkaten a naan-anay iti quarantine ta nakunana nga adda iti bukod a pagannurutan iti kada probinsia a posible a pakarigatanda nga agawid.
Iti agdama, mayur-uray iti panangiyulog iti pagannurutan manipod iti National Government tapno makaiyetnagen ni Gov. Singson para iti suruten dagiti masakupanna a manamnama a mairuar inton sakbay iti bulan iti Mayo.
Kabayatanna, pagyamanan unay ni Gov. Singson iti dakkel a tulong dagiti health workers ken frontliner nga isuda iti kangrunaan a makitintinnulong iti gobierno isu a gagemna a masigurado iti kinatalgedda nga isu iti ipangpangrunana iti agdama ken kasta pay iti pannakapatakder kadagiti pasilidad ta no man bilang nga adda iti outbreak ket nakasagana latta iti lokal a gobierno para iti serbisyo a maipaay kadagiti maapektaran iti nasao a virus.
