Indauloan ni Presidente Ferdinand Marcos Jr. ti panagsapata ni General Jose Melencio C. Nartatez Jr. kas full-fledged a Philippine National Police (PNP) Chief iti maysa a pormal a seremonya a napasamak idiay Malakanyang.
Kinablaawan ni Presidente Marcos ni Nartatez iti pannaka-dutok na kas PNP chief ket impaganetget na ti suporta iti panang-sango na iti responsibilidad ken karit iti salinong ti opisina-na.
Segun ken ni Palace Press Officer Atty. Claire Castro, binigbig pay ti presidente ti napateg nga akem ti PNP ti panangpatalinaed ti kinaurnos ken seguridad ti pagilian.
Dati a nagserbi ni Nartatez iti agduduma a posision a pakairamanan ti panagbalin na a PNP Deputy Chief for Administration idi 2024-2025; National Capital Region Police Office Director idi 2023-2024; Regional Director of Police Regional Office IV-A Calabarzon idi 2022-2023; ken Ilocos Norte Police Provincial Office Director idi 2016-2018.
Sinukatan ni Nartatez kas PNP chief ni MMDA General Manager Nicolas Torre III. Reynand Fontejon
