Naallukoy dagiti umili babaen iti pannakipaset iti panagpiesta iti Vigan manipod January 16 agingga January 25, 2026 ta ibilangda a karagsakan a panagfiesta gapu ta maikaduapulo ket lima a tawenen iti anibersaryo iti panag-siudad Vigan.
Kagiddan dayta ket inlawlawag ni Vigan City Mayor Randy Singson no apay a nabayagan iti panagsana para iti karbabalan ta kiniddaw dagiti operator a mailaklaka ti mabayadan dagiti ag-rides tapno sigurado nga adu iti mapan iti karnabalan bayat iti panagrambak ti panagsiudad ti Vigan.
Kinuna ti Mayor nga adda ngamin dagiti maiparit nga ay-ayamen dagiti umili kas mayataday iti National Law nangruna iti pannakaiparit iti panagsugal.
Iti baet met a kayat a solbaren ti mayor ti parikot iti parking area dagiti mapan makipagrambak ket kinunana nga amangan no sangwen latta iti nasao a problema ta manmano laeng iti designated area para iti pagparkingan ti lugan.
Kiddaw met ni Sangguniang Panlungsod Member Karen Baquiran kadagiti tricycle driver a suroten iti fare matrix dagiti pasahero ket saan ida a panginaan nangruna ket adda dagiti turista nga agpaspasyar iti siudad.
Palagipna kadagiti commuter a silulukat iti opisinada tapno tignayan dagiti ag-overprice iti plete.
Namnamaen met ni Sangguniang Panlungsod Member Kisses Agdamag-Lim nga ad-adu iti makipagrambak ta isu iti Silver Anniversary ti panagsiudad ti Vigan ta ipaayda amin a kabaelanda tapno mapasayaat iti panagselebrar ita a tawen.
Kabayatanna, iti biang ti Vigan City Police Station ket impasigurado ni PLt. Col Reynaldo Mendoza Jr. iti seguridad dagiti umili bayat ti panagpiesta iti siudad ta adda dagiti naideploy a kameng ti kapulisan kadagiti designated areas wenno pakaisayangkatan dagiti aktibidad.
Kiddawna iti panagan-annus ken panagpasensya dagiti bisita a dumar-ay nangruna ta adu dagiti manamnama a makipagrambak iti piesta.
