Dua ti nadunor iti panagpaputok iti rifle iti polling center idiay Bangued, Abra a nakataktakan pay ti panagpipili.
Iti pannaki-uman ti Bombo Radyo Vigan ken ni PLTCOL. Daniel Pel-ey manipud iti Abra Police Provincial Office, alas syete iti bigat idi nagresponde ti Bangued police iti komosyon iti polling precinct idiay Sagap Elementary School.
Kalpasan dayta, nangngegan ti nagsasaruno a putok ti paltog iti riverside nga isu ti dumaldalanan dagiti agbotos tapno makadanon iti pagadalan.
Dua met a lugan ti nakita dagiti agindeg a napan iti Bangued proper.
Nupay kasta, natalgeden ti kasasaad dagiti biktima ken manarimaan ti imbestigasyon dagiti pannakabagi ti linteg iti napasamak.
Kabayatanna, nagtuloy met ti panagbotosan iti nasao a pagadalan, ngem dagiti dadduma a botante ket nagsawid gapu iti butengda.
Naibalakad met iti publiko a liklikanda ti agiwaras iti peke a damag a mangitunda iti panagbuteng dagiti botante.
Mangnamnama ti Abra Police nga awanen ti sumaruno a kinaranggas a mapasamak kagiddan ti eleksyon.
