Impila ni Senator Erwin Tulfo ti gakat a gagem a maipababa ti value-added tax (VAT) manipod 12% ket agbalin a 10% kas tignay iti agtultuloy a panagngina ti presyo ken serbisyo iti pagilian.
Iti naipila a Senate Bill No. 1552 wenno gakat a “VAT Reduction Act of 2025″, impaganetget ni Tulfo a ti panagbaba ti VAT ket direkta a makatulong iti panagpalag-an iti dadagsen dagiti Pilipino iti nangina a magatang karamanen iti panangpapigsa iti kabaelanda a gumatang.
Kinunana nga imbes a mangnamnama dagiti Pilipino iti tulong-pinansyal iti gobierno a posible a masayang gapu iti korapsyon ket nasaysayaat nga agtalinaed ti kuarta iti bulsa dagiti umili.
Inlawlawagna a ti nababbaba a VAT ket posible a mangallukoy iti nangatngato a panaggastos dagiti konsyumer a posible a mangparegta iti ekonomia.
Babaen iti nasao a wagas ket mabalin nga ibabawi ti gobierno ti posible a pagkurangan iti sapul bayat nga umad-adu iti aktibidad iti ekonomia.
Pinasingkedanna pay a ti Pilipinas ken Indonesia iti kangatoan ti VAT-na iti Southeast Asia nga agpada a 12% idinto a ti dadduma a pagilian ket adda VAT-da manipod 7% agingga 10% laeng.
Impaganetgetna a ti VAT Reduction Bill ket saan laeng a makatulong kadagiti ordinary nga umili no diketdi uray iti panangpasayaat ti panagbalin a competitive iti pagilian iti rehiyon.
