VIGAN CITY – Saan a pakarikutan ti ACT Teachers Partylist ti panaglukat ti klase inton August 24 no la ket di masigurado iti kinatalged dagiti estudiante ken dagiti mangisursuro kadagiti pagadalan.
Iti pannaki-uman ti Bombo Radyo Vigan ken ni Rep. France Castro, anamonganna ti online teaching ta wagas dayta tapno masalakniban iti tunggal agad-adal manipud iti COVID19 ken saanda nga agdudupudop ngem kunana a duapulo a porsiento laeng dagiti addaan iti internet access idinto a ti nabatbati a walopulo a porsiento ket mailaklaksiddan iti panagadal babaen iti online.
Kabayatanna, pinasingkedan ti kongresista a kasapulan a makita iti schedule no malimitaran ti bilang dagiti agad-adal a sumrek kadagiti classroom.
Malaksid iti dayta, kidkiddawenna iti pannakairaman dagiti pribado a pagadalan iti tulong nga aggapgapu iti gobierno ta adu dagiti pribado a mangisursuro a naapektaran iti “no work, no pay” ken rumbeng a matulongan ida.
