Uppat ti nadunor iti panagdinnungpar ti motorsiklo ken kurong-kurong idiay Sitio Ermita-Mindoro Road, Barangay San Sebastian, San Vicente, Ilocos Sur.
Ti lalaki a drayber ti motorsiklo ket agtawen iti sangapulo ket tallo, kinalubbonna ti maysa a lalaki nga agtawen iti sangapulo ket dua nga agpada nga agnaed iti nasao a lugar, awan ti suotda a helmet ken reflectorized vest.
Ti met nagmaneho iti kurong-kurong ket ni JP Reynon Verzosa, agtawen iti tallopulo ket maysa, taga-Barangay Aggay, Bantay, Ilocos Sur, inluganna ni Rubilyn Marquez Rojo, agtawen iti tallopulo ket tallo, taga-Barangay Poblacion, San Vicente.
Iti pannaki-uman ti Bombo Radyo Vigan ken ni PLT. Archie Anipot, Deputy Chief of Police ti San Vicente Police Station, agpapa-amianan ti motorsiklo idinto nga adda iti bangir a linya ti kurong-kurong ket idi nadanonda ti nakapasamakan ti aksidente, inagaw ti kurong-kurong ti linya ti motorsiklo isu a nagdinnungparda.
Gapu dayta, nadunor dagiti karaman ken naipanda iti ospital para iti pannakatamingda.
Natakuatan a nakainom dagiti naglugan iti kurong-kurong idi mapasamak ti aksidente.
