Maysa ti nadunor iti panagdinnungpar ti motorsiklo ken kurong-kurong iti national highway ti Barangay Oaig-Daya, Candon City, Ilocos Sur.
Ti kurong-kurong ket minaneho ti menor de edad, inluganna da Nora Lavaro Gaoat, agtawen iti uppat a pulo ket siam ken ti maysa a grade 2 pupil, nga agpapada a taga-Sitio Paratong Sur, Barangay Calungbuyan, Candon City.
Ti met nagmaneho iti Yamha MXi 125 motorcycle ket ni Jordan Djangoboy Ramos, agtawen iti duapulo ket dua, taga-Barangay Alicaoeg, Sta. Lucia.
Iti pannaki-uman ti Bombo Radyo Vigan ken ni PLT. Jovelyn Antalan, agpapa-abagatan ti kurong-kurong idinto nga adda iti bangir a linya ti motorsiklo, ngem idi madanon ti nakapasamakan ti insidente, nagsikko ti kurong-kurong a mapan koma aggasolina ngem isu met ti gundaway a nagdinnungparda iti motorsiklo.
Gapu dayta, na-fracture ti saka ti drayber ti motorsiklo gapu iti pannakaidungparna iti side wheel ti kurong-kurong nga agingga ita ket maag-agasan pay laeng iti ospital.
Saan met a naan-ano dagiti naglugan iti kurong-kurong ngem ti lugan ti nadadael.
Iti agdama, awan pay ti inisyal a nagpatangan dagiti karaman iti aksidente.
