VIGAN CITY- Dua ti nadangran iti panagdinnungpar ti dua a motorsiklo iti barangay road ti Brgy Sarsaracat, Magsingal.
Nabigbig ti nagmaneho ti nalabaga a Euro 150 motorcycle a ni Leonel Utrera, agtawen iti tallopulo ket dua, naasawaan, mannalon, ken adda backride-na a ni babai a menor de edad, agpada a saan a nakasuot ti helmet a taga Brgy Sarsaracat, Magsingal.
Ti met nagmaneho iti Euro 110 motorcycle ket ni Isagani Taguya, agtawen iti tallopulo ket dua, construction worker, nakasuot iti helmet ngem awan lisensyaken awan headlight ti luganna.
Agpapaabagatan ni Utrera idinto nga agpapamianan met ni Taguya ket idi nadanunda ti nakapasamakan ti aksidente, immagaw ti linya ni Taguya a puon ti panagdinnungpar dagiti dua a lugan.
Nadunor ni Taguya ken ti menor de edad a backride a naipan iti Ilocos Sur District Hospital ti Magsingal ket naamoan a mapapati a nakainom ni Taguya.
Iti agdama, addan iti kustodiya ti kapulisan dagiti dua a drayber para iti idadalanda iti husto a proseso.
