VIGAN CITY – Dua ti natay iti panagdinnungpar dagiti dua a motorsiklo idiay Barangay Taleb, Bantay, Ilocos Sur.
Nabigbig dagiti karaman iti aksidente a da Roger Valencia Sadiasa, nagmaneho ti motorsiklo a Yamaha Nouvo, agtawen iti innem a pulo ket tallo, residente ti nadakamat a lugar.
Ti met nagmaneho iti motorsiklo a Honda Click ket maysa a menor de edad nga agtawen iti sangapulo ket pito, ken ti backrider na a ni Manolito Valdez Rivera, agtawen iti limapulo ket tallo, agpada a residente ti Tablac, Candon City.
Iti pannaki-uman ti Bombo Radyo Vigan ken ni Police Major Pol Areola, hepe ti Bantay Municipal Police Station, nakita ti CCTV ken maibasar pay kadagiti nakakitan, naggapu ti motorsiklo a Yamaha manipud La Caridad Gas Station, ket idi nalpas a naggasolina, nag-counter flow, ken kalpasan a napalabasna dagiti dadakkel a lugan, nagballasiw iti national highway nga agturong iti abagatan, ngem saan a napakpakadaan ti motorsiklo a Honda Click a gapuanan iti aksidente.
Gapu dayta, nagsagaba iti dunor ti driver ti Honda iti makinkannawan nga abagana ken agpapada a naipan iti Metro Vigan Hospital ngem naideklara a dead on arrival ti back rider na ken ti driver ti Yamaha.
Balakad ni Areola kadagiti motorista, paliiwin ti aglawlaw dumalyasat iti kalsada ken kitaen ti laud ken daya no agballasiw ti national highway tapno malilikan ti aksidente.
