Dua ti natay iti napasamak a pammaltog iti Lyric Building idiay Barangay VIII, Vigan City, Ilocos Sur.
Nabigbig ti biktima a da Robert Dela Cruz Apanay, agtawen iti duapulo ket siam, barbero, taga-San Julian Sur, Vigan City ken ti maysa managan iti Audrey.
Ti met suspek ket ni Jayson Caacbay Oriente, agtawen iti tallopulo, taga-Barangay Poblacion, Santol, La Union.
Iti pannaki-uman ti Bombo Radyo Vigan ken ni PLTCOL. Reynaldo Mendoza Jr., napan ti biktima iti lamisaan ti suspek nga agin-inom iti uneg ti establisimiento idin ta rimsua ti saanda a nagkinnaawatan.
Immunan a rimuar ti babai iti establisimiento ken naanawa met dagiti dua nga agriri iti uneg ngem idi makaruarda ket intuloyda pay laeng.
Dinuyok ti biktima ti suspek babaen iti screwdriver ken pinagkakaduaan pay isuna ti grupo ti biktima a nangdangran.
Iti dayta a kanito, inruar met ti suspek ti paltog manipud iti bagna ket pinaltuganna iti nadumaduma a paset ti bagi dagiti biktima.
Dead on the spot ti lalaki a biktima idinto a ti babai ket dead on arrival iti ospital.
Nakemmeg metten ti suspek a pimmaltog ngem naipaagas met laeng iti ospital gapu iti dunor a sinagrapna iti pammagkong.
