Maidalan pay iti validation babaen iti legal team no maibilang nga election-related incident ti napasamak a pammaltog idiay Barangay Nagtupacan, Lagangilang, Abra a nakatayan ti dua a tao.
Ti biktima ket ni Lou Salvador Claro, agtawen iti limapulo ket pito idinto a ti suspek ket ni Manzano Bersalona Agdalpen, agtawen iti limapulo ket walo, addaan ti live-in partner, kandidato para ti Sangguniang Bayan, agpada nga agnaed iti nasao a lugar.
Iti pannaki-uman ti Bombo Radyo Vigan ken ni PCOL. Froiland Lopez, Provincial Director iti Abra Police Provincial Office, maysa a managan iti Rommel Apolinar ti agtaktakder iti igid ti kalsada ti pinaltugan ni Manzano Agdalpen nga agpaidasing kas Sangguniang Bayan.
Timmaray ni Apolinar a nagpulong ken ni Barangay Captain Claro a napan iti lugar tapno anawaen ida ngem dinanog manen ni Agdalpen ni Apolinar isu a bimmales.
Induron ni Agdalpen ni Brgy. Captain Claro, ket inasotna ti paltog sana imputok ken ni Claro iti namin-ano a daras idinto a ti suspek ket pinaltogan ti saan pay a nabigbig a suspek.
Naipan ti biktima iti Seares Hospital para koma ti pannakatamingna ngem naideklarar a dead on arrival idinto a ti suspek ket naipan iti Abra Provincial Hospital ngem naideklarar met laeng a dead on arrival.
Iti agdama, plano ti Abra PPO a mangideploy iti tropada kadagiti barangay tapnon maliklikan dagiti kastoy a pasamak.
