VIGAN CITY – Agtultuloy ti imbestigasyon dagiti kameng ti Sto. Domingo Municipal Police Station iti pammaltog a napasamak idi alas tres singkuwenta y singko iti malem idi kalman idiay Barangay Nambaran, Sto. Domingo a nakatayan ni Geronimo Verazon nga agtawen ti uppat a pulo ket innem ken nakadunuran ti putot na a ni Mark Denver Verazon nga agtawen ti walo nga agpada nga agnaed idiay Barangay Nagbettedan, Sto. Domingo.
Segun kenni Police Master Sgt. Benito Ponce Jr, chief investigator ti Sto. Domingo PNP, agpapalaud dagiti agama a nakalugan ti motorsiklo idi pinaltugan dagiti saan pay nabigbig a suspek a nagsagabaan ni Geronimo ti walo a tama iti paltog iti naduma-duma a paset iti bagi na a poon iti nakatayan na.
Ti inisyal a panagsukimat da, naduktalan da nga awan iti nakainaigan ti biktima a krimen itay kallabes malaksid laeng iti masansan a panagririda iti asawana ken mapapati a panangkabkabilna kenkuana.
Maidalan iti naannay nga examination dagiti naala a tallo a basyo ti bala iti mapapati a calibre 45 kas paset iti naun-uneg a panagsukimat dagiti pannakabagi ti linteg.
