VIGAN CITY – Desidido nga agidarum ti pamilia ti lalaki a natay iti panangbagkong ti amana idiay Barangay Marozo, Narvacan, Ilocos Sur.
Nabigbig ti biktima a ni Norman Yamson, agtawen iti tallopulo ket lima idinto a ti suspek ket ni Flordelino Torres Tadeo, agtawen iti innem a pulo ket dua, agpada nga agnaed iti nasao a lugar.
Iti pannaki-uman ti Bombo Radyo Vigan ken ni Police Staff Sergeant Engelbert Yadao iti Narvacan Police Station, nabiit pay a nagkadua dagiti agama ta ti biktima ket inampon idi ti ikit ti inana idi ubing pay gapu ta nagsakit ti inana ket saanna a kabaelan ti agaywan isu nga agduma ti apilyedoda.
Segun pay ken ni Yadao, agpada a nabartek a simmangpet dagiti agama iti balayda idin ta binagaan ti biktima ti amana a maturogen ngem gapu ta nasuron met ti suspek ket nabugkawanna ti anakna.
Gapu dayta, nakapungtot ti biktima ket nangala ti botelya nga imbansagna ti amana ket idi makita ti suspek dayta nga inaramid ti putotna, nangala ti patadem ket dinuyokna ti bakrang ti biktima.
Kaso a parricide met ti sangwen ti suspek gapu iti inaramidna.
Kabayatanna, pagbabawyan met ti suspek ti inaramidna ket kunana a bastos ti panagkitkitana iti putotna isu a napunwanen.
Segun iti suspek, awan met ti pagriririanda ngem kasuronna ti panangsungsungbat kenkuana ti putotna ken kimmaro ti pungtotna idi makitana a bansagen isuna ti botelya ti biktima.
Kunana a naamirisna laengen ti inaramidna idi madamagna nga agngangabiten ti biag ti putotna.
Nasakit met ti nakem ti asawa ti suspek ken ina ti biktima a ni Virgie Tadeo ket kunana a saanen nga agbabawi ti suspek ken isunan a mismo ti mangpatay kenkuana no makaruar pay laeng iti pagbaludan.
