Naigagara ti pannakauram ti pagtaengan idiay Barangay Paras, Sto. Domingo kas pinasingkedan ni Barangay Captain Nelson Fagela.
Iti pannaki-uman ti Bombo Radyo Vigan ken ni Fagela, nangsindi ti papel ti suspek nga impurwakna kadagiti naipempen a lupot nga isu ti nagramaraman ti apuy.
Nagtitinnulongda met a nangdepdep kadua dagiti agindeg iti nasao a barangay.
Innayon ni Fagela nga ugali ti suspek a no saan a mapagustwan wenno mapatgan kadagiti kiddawenna iti pamiliana kas ti sigarilyo ken softdrinks ket agprobokar, malaksid pay ti panangkabkabilna iti inana.
Impakitada idi iti mental hospital ngem natakuatan nga awan met ti parikut iti panagpampanunotna.
Segun met iti ina ti suspek a ni “Lourdes”, idi manen ket dinadael ti anakna ti TV ken durabox da ken impittakna dagiti pingganda ngem binaybay-anna lattan gapu ta anakna.
Ti panagkiddaw manen ti suspek iti sigarilyo ti puon ti nangur-uramanna iti pagtaenganda ken dinangranna pay ti inana.
Karaman kadagiti nauram dagiti lupotda, ken dagiti nakapempen a lasuna iti uneg ti balayda.
