VIGAN CITY – Nag-mass hiring dagiti establisimento idiay Doha, Qatar kadagiti nurse wenno medical worker ta isu ti kangrunaan a kalkalikaguman ti gobiernoda iti kangitingitan ti COVID19 tapno naal-alisto ti panangparmekda ti nasao a sakit kas pinasingkedan ni Bombo International Correspondent Jason John, maysa a nurse iti nasao a pagilian.
Segun ken ni John, iti medical facility a pagub-ubraanna ket isu ti ayan ti kaaduan kadagiti pasyente a nagpositibo iti nasao a sakit nangruna kadagiti Pilipino.
Kabayatanna, dagiti Pilipino ti maysa kadagiti kangrunaan a naapektaran iti krisis agsipud ta awanen ti sweldo a maawat dagiti adda iti pribado a pagtrabahoan ngem no pay kasta ket adda ti ited kadakuada ti Overseas Workers Welfare Administration (OWWA) a permaanda tapno maikkanda ti tulong nga aggatad ti sangapulo a ribo a pisos.
No pay kasta, nainget latta ti pannakaipatungpal dagiti pagannurotan iti nasao a pagilian kas iti panagaramat ti face mask ken gloves no mapan iti pampubliko a lugar sa adda maipapaay kadakuda a hand sanitizer wenno alcohol.
