Binilin ti Supreme Court ti Philippine Amusement and Gaming Corporation ken Philippine Charity Sweepstakes Office nga ited ti bingayda iti mapaspastrekda manipud iti Philippine Sports Commission.
Dayta ti desisyon ti Korte Suprema manipud iti petition for mandamus nga impila ni dati a Pampanga Congressman ken Rain or Shine coach Yeng Guaiao idi 2016.
Iti nasao a petisyon ket mabilbilin ti PAGCOR, PCSO ken Office of the President nga agiremit iti pondo iti PSC kas imanmandato ti Republic Act 6847 wenno ti “The Philippine Sports Commission Act”.
Segun ken ni Guiao, saan a sinurot ti PAGCOR ken PCSO ti nakailanad iti Section 26 a nasken nga agitedda iti bingayda kas gross income iti PSC.
Ti pondo ket mausar iti panagsanay ken pannakipaset dagiti national athletes kadagiti international competition kas ti Asian Games, Southeast Asian Games ken Olympic Games.
