Nakairekord ti Pag-IBIG Fund iti P63.23 billion a net income manipud Enero agingga Setyembre ita a tawen, nangatngato ngem iti 23.5 percent no yarig iti P51.19 billion iti isu met laeng a panawen idi napan a tawen.
Segun ken ni Pag-IBIG Fund Deputy CEO Benjamin Felix Jr., nakatulong iti panagdur-as ti pastrek ti nangato a bilang ti housing loan releases ken panagilako kadagiti acquired assets.
Umabot met iti P111.29 billion ti naiwaras a housing loans ken P88.64 billion iti short-term loans, idinto a mangnamnama ti ahensia a maragpat ti target-na a nasurok P165 billion a housing loans sakbay a malpas ti tawen.
Kabayatanna, nagtaltalinaed a nangato ti interes dagiti miembro iti Modified Pag-IBIG 2 wenno MP2 savings program iti baet ti agtultuloy a panagpangina ti presio dagiti magatang.
