Nangilatang iti umabot P9 billion iti 2026 national budget ti Kongreso tapno yatiddog ti pannakaipatungpal ti Academic Recovery and Accessible Learning (ARAL) program kas pinasingkedan ni Senador Sherwin Gatchalian.
Segun ken ni Gatchalian a chairman iti Senate committee on finance, gagem ti programa a paingeten ti learning recovery ken mapasayaat ti reading comprehension dagiti agad-adal.
Maibasar ti Middle of School Year Assessments iti Department of Education (DepEd), ngimmato iti nasurok-kumurang lima a puntos iti kinasagana nga agbasa wenno reading readiness dagiti agad-adal manipod Grade 3 agingga Grade 6.
Umabot met iti innem agingga siam a puntos iti ngimmatoan ti performance dagiti agad-adal iti Grade 7 agingga Grade 10.
Rimmuar pay a 3.42 million nga agad-adal manipod Grade 3 agingga Grade 6; ken 1.72 million nga agad-adal manipod Grade 7 agingga 10 iti dandanin makagun-od ti grade-level reading proficiency.
Iti salinong ti 2026 national budget, P8.96 billion iti nailatang iti ARAL Program tapno maaddaan ti 440,000 tutors ken matulongan iti 6.7 million nga agad-adal para iti School Year 2026-2027.
