Walopulo a milion a pisos ti nailatang iti 2025 national budget para iti scholarship program ti child development worker, kas pinasingkedan ni Senador Sherwin Gatchalian.
Karaman kadagiti naaprubaran a national budget ti maysa nga special provision nga impila a gakat ni Gatchalian, a nailatang ti P80 milion a pondo iti salinong ti Promotion, Development, and Implementation of Quality Technical Education and Skills Development Authority Programs ti Technical Education and Skills Development Authority.
Iti salinong ti special provision, maikkan prayoridad dagiti agdama a child development worker nga agingga high school laeng ti naiturposna.
Tapnon maipatungpal ti nasao a programa, mangbukel iti pagallagadan ti TESDA ken ti Early Childhood Care and Development Council.
