Epektibon sipud idi kalman ti kari ni Presidente Ferdinand Marcos Jr nga ipaayan iti medical allowance dagiti civilian government employee.
Iti maysa nga statement, pinasingkedan ti Department of Budget and Management nga inaprubaran ni Budget Secretary Amenah Pangandaman ti pannakairuar ti Budget Circular No 2024-6, napetsaan iti December 12, 2024.
Ipaay ti circular ti guidelines, rules and regulation iti pannakaited ti medical allowance kadagiti kwalipikado a civilian government personnel.
Ti pannakaited ti medical allowance a saan nga ad-adu ngem P7,000 kada tawen – kadagiti government worker ket naipalubos iti salinong ti Executive Order No 64 series of 2024 – a mangisingsingasing iti salary increase kadagiti government personnel a pinermaan ti presidente idi Agosto 2, 2024.
Sakup ti benepisyo dagiti empleado ti local government unit ken dagiti local water district, ngem saan kadagiti kameng ti gobierno a job order ken contract of service.
Maited daytoy babaen iti HMO-type product coverage, a mabalin nga iavail dagiti government agency a maseknan kadagiti organization/gruppo dagiti empleado.
Mabalin pay met a babaen iti cash kadagiti agavail iti bukodda wenno agbayad wenno agrenew kadagiti existing HMO-type benefit da.
