Impakaammo ti Commission on Audit (COA) a P6.45 million ti napukaw iti gobierno manipod iti nasurok 700 a saan a naaramat wenno natengga nga infrastructure project iti Department of Public Works and Highways (DPWH).
Segun ti komisyon, 747 a proyekto iti saan a simmurot kadagiti probisyon dagiti kontrata gapu iti pagkurangan ti husto a panangidaulo ken panagbantay kadagiti nasao a proyekto ken saan a pakairanudan gapu iti teknikal a depekto.
Kinuna pay ti komisyon a ti agtultuloy a depekto ken pagkurangan ket mabalin a mang-kompromiso iti kinatalged iti publiko, agresulta iti nakarkaru a damage iti imprastraktura ken agresulta iti pannakasayang iti pondo ti gobierno ken resources no saan nga insigida a matignayan.
Nadiskubre dagiti nasao a depekto ken pagkurangan dagiti proyekto kadagiti lima a District Engineering Offices idiay Cordillera Administrative Region, maysa iti Ilocos Region, 11 idiay Cagayan Valley, 7 idiay MIMAROPA, 7 idiay Bicol Region, 9 idiay Western Visayas, 2 idiay Eastern Visayas, 2 idiay Zamboanga Peninsula, 5 idiay Northern Mindanao ken 2 idiay Caraga.
Inallukoy ti COA iti DPWH nga imandato kadagiti kontraktor nga insigida nga isimpa ken sayaaten ti pagkuragan ken i-deliver dagiti kasapulan a gamit tapno maleppas dagiti proyekto kas mayataday kadagiti terms ken specifications a nakalanad iti kontrata.
Nabalakadan pay iti ahensya a mangisayangkat iti regular inspections ken monitoren iti amin nga infrastructure projects tapno masigurado a makumpleto iti amin a proyekto kasaruno kadagiti naaprubaran a plano.
