Mailaklako iti gatad a P27 kada kilo ti bagas idiay Nueva Segovia Consortium of Cooperatives wenno NSCC – Caoayan iti probinsia nga Ilocos Sur.
Iti pannaki-uman ti Bombo Radyo Vigan ken ni Divina Quemi a Chief Executive Officer iti NSCC, ti panagilakoda ti nalaka a presyo ti bagas ket kas pannakipasetda ti International Day of Cooperatives ita nga aldaw July 5, 2025 ken wagas a panangtulong kadagiti umili tapno malakaanda nangruna ita a panagtutudo.
Segun ken ni Quemi, dagiti ilaklakoda ket ginatangda mismo kadagiti mannalon a miembro met laeng iti NSCC.
Malimitaran iti agingga 25 kilos iti mabalin a gatangen ti tunggal gumatang tapno masigurado nga adu iti mairanud iti nalaka a presyo ti bagas.
Iti baet a nalaka ket siguradoen ni Quemi a napintas ti kalidad ti bagas ta kapabpabayoda laeng.
Ti pannakailako ti nalaka a bagas ket maysa nga aldaw laeng a nangrugi itay alas dos y media iti malem July 5, 2025 ken agpaut iti oras met laeng iti alas dos y media inton bigat July 6, 2025.
