Insingasing ni Rep. Antonio Tinio iti ACT Teachers Partylist a mayakar ti paset iti P250 billion a proposed fund para iti flood control projects inton 2026 iti Department of Health, tapno agbalin a libre ti outpatient services kadagiti pampubliko nga ospital.
Iti pannaki-uman ti Bombo Radyo Vigan ken ni Tinio, nagkiddawda iti pammalawag iti DOH ta kayatda a maammuan no kasano a mapondoan ti zero balance billing kabayatan ti interpellation ti ahensia para iti badyetda ita a tawen.
Tallo ti nadakamat a paggapuan ti pondo nga isu ti Philhealth, pondo manipud iti Meical Assistance to Indigent Patients ken iti bukod a pastrek dagiti ospital ti DOH.
Babalawen ti grupo ti pondo nga aggapu kadagiti DOH hospital ngem no ti P250 billion a proposed budget para iti flood control ket mayakar, agbalinen a libre ti outpatient kadagiti government hospital, banag a patienna a dakkel a pakabang-aran dagiti umili.
Impaganetget ti kongresista a nasken nga adda kasiguradwanna iti panangilatang iti pondo ta masapul a ti zero balance billing ket libre para iti amin.
