Kinumpirmaran ti maysa nga auditor ti Commission on Audit (COA) ti ginastos iti opisina ni Vice President Sara Duterte ti P125 million confidential funds iti uneg laeng iti sangapulo ket maysa nga aldaw idi December 2022 ngem napaayda a nangipasa ti detalye maipanggep kadagiti confidential activities no nakagastosan iti nasao a pondo.
Segun ken ni COA auditor Roderick Wamil iti Senate impeachment court, napaay a naipasa ti Physical and Financial Plan ken accomplishment report iti OVP tapno ilanad iti confidential activities a napondoan iti cash advance.
Maibasar kadagiti dokumento nga impasa iti OVP iti COA, kinuna ni Wamil a ti P125 million confidential funds ket nagastos manipod December 21 agingga 31, 2022.
Limlimitaran ti Joint Circular No. 2015-01 ti panagaramat ti confidential funds kadagiti kangrunaan a magastos kas iti panaggatang iti impormasyon maipanggep ti national security ken peace and order, panagabang kadagiti lugan para iti confidential activities, panangpatalinaed dagiti safe house, panagala iti operational supplies ken alikamen, ken panagbayad iti kualipikado a rewards kadagiti non-employee informers.
Segun ken ni Wamil, adda nakitada a pagkurangan ti naipasa a Physical and Financial Plan ken accomplishment report iti OVP.
Innayonna a saan a nadakamat iti plano dagiti aktibidad a pangaramatan ti cash advance ken saan pay a nadakamat ti accomplishment report dagiti aktibidad a naisayangkat wenno nalpasan.
Kasta pay a saan nga impasa ti OVP ti documentary evidence of payments kas nakaipasidong ti item 4.12 iti Joint Circular 2015-01.
Iti salinong ti 4.12, dagiti disbursement manipod confidential funds ket rumbeng a suportaran ti documentary evidence of payment nga ipaspasa iti COA audit unit iti uneg iti maysa a sealed envelope a napirmaan iti special disbursing officer.
