Inyunay-unay Senate President Pro Tempore Jinggoy Estrada a nakadepende iti mayorya dagiti senador ti gasat ti naisingasing a badyet ti Office of the Vice President (OVP).
Agingga ita segun ken ni Estrada, saan pay a napagsasaritaan ti majority bloc dagiti senador ti badyet ti OVP.
Inlawlawa met ti senador a saan isuna a karaman kadagiti pito a senador a kinasarita ni Senador Joel Villanueva nga adda panggepda a mangnayon iti naisingasing a 2025 budget ti OVP.
Maipalagip a ti orihinal a proposed fund allocation a naited iti OVP babaen ti National Expenditure Program (NEP) wenno ti badyet manipud iti ehekutibo ket P2 billion, ngem inikkatan ti kamara ket pinagbalinda a P733 milion babaen ti 2025 General Appropriations Bill (GAB), nga inadaptar ti Senate committee on finance.
