Opisina ti principal idiay Bantay, natakawan

VIGAN CITY – Maysa a laptop nga aggatad ti PHP 39, 900 ken CCTV recorder a mapatta-patta nga aggatad ti PHP 15,000 iti tinakaw dagiti saan pay a nabigbig a suspek idiay Silang Elementary School, Barangay Puspus, Bantay idi agsapa ti October 20.

Maibasar iti inisyal nga imbestigasyon, napan iti pagadalan ti janitor a ni Rey Pablico Quezada nga agtawen lima pulo ket innem, naasawaan nga agnaed idiay Barangay Aggay, Bantay ta mapam agiddep iti silaw idi nakita na a napursaran a nalukatan iti ruwangan iti opisina ni Principal Benilda Canonizado nga agtawen ti uppat a pulo ket walo, naasawaan ken agnaed idiay Barangay Balaleng, Bantay.

Idi simrek iti nasao nga opisina, nakita na a nagkaiwara dagiti alikamen iti uneg ken mapukpukawen ti laptop ken ti CCTV recorder.

Insigida a naipaka-ammo kadagiti pannakabagi ti linteg iti nasao a pasamak ket manarimaanen iti naun-uneg nga imbestigasyon da inaig iti nasao a panagtakawan tapnu mabigbig nu siasino dagiti suspek.

Maipalagip a daytoyen iti maikadua a panagtakawan a napasamak idiay ili ti Bantay ta ti damo a natakawan ket ti Tay-Ac Elementary School idi Biyernes, October 18 a ti napukaw met laptop nga aggatad ti PHP 29,000; maysa a cellphone nga aggatad ti PHP 10,000 ken kwarta a PHP 8,000.