Nangnayon ti Philippine National Police (PNP) kadagiti kamengda iti 911 command center tapno mapadaras iti panagtignay iti didigra, insidente ken dadduma pay nga emergency.
Segun ken ni PNP Chief Gen. Nicolas Torre III, nanayunan ti sangapulo nga operator a naipan iti 911 hotline tapno nadaras a makasungbat iti tawag ti publiko.
Naaramid tapno maliklikan ti panagpila dagiti tawag a gappuanan ti pannakadelay iti panagresponde.
Impaganetget ni Torre a targetda a masungbatan dagiti tawag iti uneg laeng iti tallo agingga lima a ring kalpasan a nababalaw iti mapapati a panankaabot iti agingga sangapulo a ring sakbay a masungbatan ti operator.
Mangnamnama iti PNP a babaen iti nayon a sangapulo nga operator ket mapadaras iti panagtignay ti 911 hotline ken maipaay nga insigida iti publiko iti kasapulan a tulong ken aksyon.
