VIGAN CITY – Matuluyen iti panagawid inton August 30 ni Carmen Aglibut Tabon, ti Overseas Filipino Worker idiay Saudi Arabia a nasurok dua a tawenen nga adda idiay King Fahd University Hospital gapu iti pannakadisgrasya ken pannaka-atake na iti uneg ti pagtaengan ti amo na idiay Riyadh, Saudi Arabia.
August 29 nga agrubwat idiay Saudi Arabia iti eroplano a pagluganan ni Tabon, kadua na ni Romella Bayatin, ti Filipina nurse a nangsarsarungkar kenkuana ken timmulong iti panagawid na ditoy Pilipinas.
Inton agsapa ti August 30, sabaten to iti pamilya na ni Tabon sa dan to ipan iti ospital ta masapul pay a maobserbaran iti kasasaad na sakbay nga agawid.
Saan a mabalin a maideretso idiay Naguimba, Banayoyo ni Tabon ta masapul na pay iti naan-anay a medical attention ta saan a makasao, saan a makabangon ken adda dua a tubo a nakakabit iti tengnged ken boksit na.
Pinasingkedan ni Bayatin a dagiti nagastos iti panagawid ni Tabon, pati ti plane ticket na nga agawid ken agsublin to idiay Saudi Arabia ket binaklay ti konsulada ti Pilipinas idiay Saudi Arabia ken ti Overseas Workers Welfare Administration (OWWA).
