VIGAN CITY – Blangko pay laeng dagiti kameng ti Candon City police station iti motibo wennu rason iti pannakapapatay ni Joel Gandol Galano nga agtawen iti tallo pulo ket pito, naasawaan, seaman ken agnaed idiay Calongbuyan, Candon City a pinaltugan dagiti saan pay nabigbig a suspek iti nasao a lugar idi alas dose y media ti parbangon idi kalman, April 7.
Segun ken ni Police Major Rene Boy Lata, deputy chief of police ti Candon City PNP, ti kagawad iti barangay a naipalapayag kadakuada a mapapati a kinariri ti biktima gapu ti water pump sakbay iti pammaltog ket maysa laeng kadagiti mabalin da a pagsaludsudan inaig iti pasamak.
Manarimaan pay iti panangkita da a naimbag iti lugar a nakapasamakan iti krimen nu adda ti CCTV camera, kasta pay dagiti posible a nakakita iti pammaltog a mabalin a makatulong iti imbestigasyon da.
Nagsaludsod dagiti otoridad iti asawa ti biktima ken dagiti kalugaran ti biktima ngem awan met iti maibaga da a nakariri na itay kallabes ken inladawan da pay ti biktima a nasingpet a tao isu a saan da a namnamaen a mapaltugan.
Naamuan nga intulod ti biktima iti gayyem na a kadua na a napan naginom ket agawid kuman idi pinaltugan dagiti suspek a nagsagabaan na iti uppat a tama iti paltog iti bagi nangruna iti barukong ken ima a poon iti nakatayan na.
