VIGAN CITY – Kaso a reckless imprudence resulting to homicide iti sangwen ni Fernando Egar Lomasang nga agtawen iti lima pulo ket tallo ken OFW a naggapu idiay Canada ngem agnanaed idiay Mambug, Santiago, gapu iti pannakadungpar na ken ni Margin Martinez Aldave nga agtawen iti innem, kindergarten ken agnaed idiay San Pablo, San Esteban a poon iti nakatayan na.
Segun ken ni Police Major Marcelo Martinez, hepe ti San Esteban municipal police station, bimmallasiw ti biktima iti kalsada idiay San Pablo, San Esteban idi alas sais trenta y singko ti rabii idi April 13 ngem posible a saan a nasiputan ni Lomasang a nagmaneho iti Toyota Grandia isu a nadungpar na.
Nagsagaba iti dunor iti ulo ti biktima ket uray pay nu naitaray nga insigida idiay Ilocos Sur District Hospital- Narvacan, naideklerar a dead on arrival.
Kabayatanna, awan pay laeng iti inisyal a nagpapatangan iti kampo ti biktima ken ti suspek nu maareglo iti kaso wennu saan ta segun ken ni Martinez, posible a saan pay a nakasagana iti pamilya ti biktima a makipatang ken ti suspek.
