Pinalagipan ti Department of Education dagiti pampubliko a pagadalan a nainget a sumurot iti “no collection policy” iti panawen ti enrollment.
Inallukoy ni DepEd Usec Michael Poa dagiti nagannak nga agireport iti ahensa no adda makolekta a bayad kadakuada.
Bayat ti panagsagsagana dagiti pagadalan iti panaglukat kadagiti klase, pinasingkedan ni Poa a saan a nasken a required dagiti nagannak a mangted tulong kadagiti kasapulan dagiti pagadalan.
Nupay kasta, nagyaman ni Poa kadagiti mangisursuro ken nagannak a nagboluntaryo nga agited iti pagadalan, nangruna iti panawen ti “Brigada Eskwela”, wenno ti tinawen a programa iti panangpatalinaed dagiti pagadalan iti intero a pagilian a mangguyugoy kadagiti stakeholder ti edukasyon.
Saan pay met a maipalubos dagiti solicitation para kadagiti posible a partner, ken sponsors, segun ken ni Poa.
