Newly identified drug personality idiay Santiago, nakemmeg

VIGAN CITY – Kaso a panaglabsing ti Republic Act 9165 wennu Comprehensive Dangerous Drugs Act of 2002 iti maipila kontra ti maysa a lalaki a nakemmeg iti naiwayat a buy-bust operation idiay Barangay Poblacion Norte, Santiago idi kalman, November 23.

Binigbig ni Police Chief Master Sergeant Miguel Pigao,deputy chief of police ti Santiago PNP, ti suspek a ni Jessie Arreola, agtawen ti tallo pulo ket uppat nga agnaed idiay Brgy. Poblacion Norte, Santiago.

Segun kenni Pigao, ni Arreola ket maibilang a newly identified drug personality iti ili.

Naala dagiti otoridad nga ikot ti suspek ti lima a transparent heat sealed sachet a naglaon iti maatap a shabu nga agdagsen ti 3.9 a gramo a mapatta-patta nga aggatad ti lima pulo ribo a pisos.

Kabayatanna, agtultuloy iti panangsapulda iti nakalibas a kadua ti suspek a ni Paul Vincent Devadeb nga agnaed idiay Brgy. Olo-Olo Norte.