Pinasingkedan ti National Disaster Risk Reduction and Management Council nga ibayogda iti ‘blue alert’ ti status da kas panagsagana iti midterm elections inton Mayo 12, 2025.
Maibasar iti Memorandum No 102, mangrugi ti blue alert status manipud alas otso iti agsapa ti Mayo 11 (Domingo) agingga alas otso iti agsapa ti Mayo 14 tapno mabantayan ken alisto a makikammayet kadagiti ahensia ken opisina.
Iti salinong ti blue alert status, kagudwa kadagiti disaster official ti NDRRMC ket nakasagana iti ania man nga emergency.
Segun ken ni Ariel Nepomuceno, opisial ti Office of Civil Defense, 68 milion a botante ti manamnama a makipaset iti eleksion ket al-allukoyenda ti publiko nga agbalin a naridam ken makitinnulong kadagiti otoridad.
362 nga election hotspots ti agdama nga imonmonitor ti Philippine National Police, nabab-baba ngem idi napalabas a tawen.
