Inserbi ti NBI Special Task Force ti subpoena ken ni Vice President Sara Duterte iti imbestigasyonda mainaig iti mapapati a pangtana ken ni Presidente Ferdinand Marcos Jr.
Ti subpoena ket inawat ti office staff ti bise presidente idiay Mandaluyong.
Nakiddaw ti kaadda ti bise presidente iti NBI Headquarters inton Biernes ken maim-imbestigaran pay gapu iti grave threat ken mapapati a panaglabsingna iti anti-terrorism act.
Malaksid dayta, nag-request ti NBI iti Facebook nga ipreserba ti video ti bise presidente idi weekend ta isu ti maaramat nga ebidensya.
Idi koma pay laeng kalman a maiserbi ti subpoena kabayatan ti house hearing. Ngem bayat ti isasangpet ti NBI idi rabii idiay Batasan ken ti panangikagumaanda a makikammayet iti Sergeant at Arms, pimmanaw ti bise presidente iti hearing ket napan iti Veterans hospital.
