Nagkiddaw ti dakdakkel a pondo ti Cybercrime Investigation and Coordinating Center (CICC) tapno mapainget ti labanda kontra ti cybercrime inton 2025.
Segun ken ni CICC deputy executive director Assistant Secretary Mary Rose Magsaysay, nagkiddawen iti ahensya iti Department of Science and Technology (DOST) a pondoan ti research ken development project-da a gagem a mabukel ti baro a tool tapno ma-detect ken malabanan ti cybercrimes kas ti ransomware attacks ken cyberfraud.
Kinuna ni Magsaysay a nagkiddawda iti tulong iti DOST tapno maipaayanda iti gundaway a mapondoan.
Idi laeng Oktubre ket nakikammayet ti CICC iti De La Salle College iti Saint Benilde para iti P15 million research project a makaaramid iti maysa nga anti-smishing program.
Ti programa ket pinondoan ti DOST a gagem a mabukel ti machine learning algorithms a kabaelanna a maanalyze dagiti pattern ken mabigbig ti senyales ti smishing attempts.
