Nagpanawagan iti tulong ti maysa a residente idiay Sitio Nanamnama, Barangay Orence, Narvacan, Ilocos Sur kalpasan a nauram iti paset ti kuarto ken kusina iti pagtaenganda.
Iti pannaki-uman ti Bombo Radyo Vigan ken ni Tessie Cabalbag, napasamak idi kalman, March 6, 2026 iti uram bayat iti kaaddana iti trabaho ngem gapu iti panangayab kenkuana iti karrubada ket insigida a napan iti pagtaenganda.
Segun ken ni Cabalbag, awan pulos iti naisalbarda a gamit iti maysa a kuarto ken kusina ta napaspas a nagkayamkam iti uram.
Iti tulong dagiti construction worker nga agub-ubra iti lugarda ket immunada a nangisayangkat iti panangdepdep iti uram bayat a mayur-uray iti tulon manipod Bureau of Fire Protection.
Iti panagresponde dagiti kameng ti BFP (BFP) ket naduktalan a nagtaud iti uram iti extension a nakasaksakan iti cellphone ken electric fan.
Aminado ni Cabalbag a datin nga adda kuslislis iti maysa kadagiti extension wire iti nasao a kuarto ngem biilinna dagiti apona a takkuban babaen iti electric tape ngem saanna nga ammo no naipangak wenno saan.
Kinunana a sakbay a mapmapanan iti trabaho iti bigat ket kitkitaenna dagiti lima a kuarto iti pagtaenganda no naikkat amin a saksakan ngem nairana dayta nga aldaw a saan a napan iti nauram a kuarto ta ammona nga adda matmaturog nga ubing.
No pay kasta ket awan iti nadangran a kameng ti pamiliada iti nasao nga uram.
