Naituding nga irusat ti gobierno ti national emergency hotline inton Hulyo babaen ti panangikagumaan ti administrasyon a mapapigsa ti seguridad ditoy pagilian.
Segun ken ni Presidente Ferdinand Marcos Jr., manamnama a maaramat ti Unified 911 Emergency System inton umay a bulan a mairugi iti National Capital Region, Bangsamoro Autonomous Region in Muslim Mindanao, Ilocos Region ken Central Visayas.
Pinasingkedan ti Department of the Interior and Local Government (DILG) nga agar-aramat ti emergency hotline iti ‘cutting-edge technology’ tapno masigurado ti napaspas a panagresponde dagiti frontline unit kas ti Philippine National Police ken Bureau of Fire Protection.
Innayon ni PNP Chief Nicolas Torre III nga idi napan a lawas a nakikammayet ti kapulisan kadagiti local government unit tapno makaipatungpal iti ‘five-minute emergency response’ policy goal.
