Umaboten ti siam a tattao iti natay, dua a nadunor ken maysa a mapukpukaw gapu ti panagduprak ti Bagyo Carina.
Segun ti National Disaster Risk Reduction and Management Council (NDRRMC), dagiti natay ket uppat manipod Zamboanga Peninsula, dua idiay Bangsamoro Autonomous Region in Muslim Mindanao (BARMM) ken saggaysa idiay Northern Mindanao ken Davao Region.
Maysa a barito ti nasarakan a natay ta nalmes idiay Infanta Bridge idiay Barangay 96, Tondo, Manila.
Mapatta-patta nga umabot ti P8.7 million ti nadadael iti agrikultura idiay Western Visayas, Zambonga Peninsula, Northern Mindanao ken BARMM idinto a ti nadadael iti imprastraktura ket P700,000 malaksid laeng kadagiti nadadael a pagtaengan a P2.5 million.
Innayon ti NDRRMC a ti southwest monsoon ket nangitunda ti nakaru a tudo iti agduduma a paset iti pagilian manipod idi Hulyo 11 a pinakaru pay ti Bagyo Butchoy ken Carina.
