Narekobren iti ili ti Quirino ti food cart a natakaw idiay Barangay Paras, Candon City, Ilocos Sur kalpasan ti boluntaryo a panangisuko ti suspek kadagiti pannakabagi ti linteg.
Ti suspek ket maysa a lalaki, agtawen iti tallopulo ket innem, tubo iti Sara, Iloilo, ngem agnanaed iti Barangay Poblacion, Quirino.
Iti pannaki-uman ti Bombo Radyo Vigan ken ni PLT. Jovelyn Antalan, boluntaryo a napan insuko ti suspek ti food cart iti Quirino Police Stationisu a naitawag met daytoy iti Candon City Police.
Dayta ket kalpasan a mai-flash alarm ti Candon City Police ti mapukpukaw lugan apaman a mai-report kadakuada.
Positibo met a binigbig ti negosiante nga akinkukua ti lugan ken kasta met ti suspek.
Maipalagip a ti lugan ket mapukpukaw sipud pay Hunyo 13 ta intaray ti suspek a dati met laeng a vendor.
Immunan a naikkat ti suspek iti panaglakona iti siomai gapu ta bassit ti malaklakwanna ket nabagaan idin nga isublina ti lugan iti balay ti manager-na.
Gapu ta saan a nagtungpal ti suspek iti naituding nga oras a panangisublina koma ket naipakaammo kadagiti pannakabagi ti linteg.
