VIGAN CITY – Balligi ti naiwayat a search warrant operation a nakakemmegan iti maysa a drug suspect idiay Barangay Cabalanggan, Bantay, Ilocos Sur, maibilbilang a Drug Cleared Barangay.
Ti subject person ket ni Darwin Peria Lapitan, agtawen iti tallopulo ket pito, agnaed iti nasao a lugar, High Value Individual PDEA Target List Member ti Beltran Drug Group.
Ti warrant of arrest na ket inruar ti Presiding Judge ti RTC Branch 9, Narvacan a napetsaan iti June 20, 2024.
Iti pannaki-uman ti Bombo Radyo Vigan ken ni PLT. Reynaldo Renon, Deputy Chief of Police iti Bantay Police Station, adda iti drugs watchlist ti suspek, dati a surrenderee iti OPLAN TOKHANG idi 2016 ken na-buybust idi April 15, 2021.
Naipakatan iti search warrant operation ti suspek gapu iti maaw-awat dagiti kapulisan a report nga adda mapmapan gumatgatang iti iligal a droga iti pagtaenganna.
Mayur-uray met ti resulta ti drug testing ti suspek tapno maduktalan no agus-usar iti iligal a droga.
Naala manipud iti pagtaengan ti suspek ti tallo a heat sealed transparent plastic sachet a naglaon iti mapapati a shabu, agdagsen iti pito a gramo ken aggatad iti PHP47,600.
Dagiti non-drug evidence ket pakairamanan ti dua a piraso ti foil, uppat a lighter, getteng, totter, dua a pagkilwan, maysa pack ti saan pay nausar a plastic, improvised scoop, nadumaduma a nausar a foil, pitaka, dua a plastic empty sachet, maysa a medium plastic empty sachet ken maysa a karton.
Nakakustodian dagiti nakumpiskar nga ebidensya iti Bantay Police Station para iti proper disposition.
